Како основен критериум и компас во надворешната политика, Грција секогаш го има меѓународното право, а еден меѓународен договор како што е Договорот од Преспа, иако предупредувавме дека е штетен, сепак, беше ратификуван и дава резултати, изјави портпаролот на грчката Влада, Стелиос Пецас на денешниот редовен брифинг со новинарите, во однос на ставот на поранешниот премиер на Грција од редовите на Нова демократија, Андонис Самарас. Тој додаде дека позициите на Самарас се познати и истакна дека Нова демократија „уште од прв момент го изрази нејзиното противење за Договорот од Преспа”.
„Нова демократија направи сè што можеше за да не се потпише, вклучувајќи и предлог за гласање недоверба на Владата. Направи сè што можеше да не се ратификува и секогаш предупредуваше дека од моментот на ратификација, ќе произведува резултати од кои Грција не може да се ослободи. Грција е земја што секогаш како основен критериум и компас во надворешната политика го има меѓународното право. Според тоа, еден меѓународен договор како што е Договорот од Преспа, иако предупредувавме дека е штетен договор, беше ратификуван и дава резултати“, рече Пецас.
Поранешниот грчки премиер Андонис Самарас при неговото обраќање на 13. Конгрес на владејачката Нова демократија рече дека политичкото прашање е како Грција ќе се ослободи од Договорот од Преспа без да ја плати цената.