На денешната седница на Судскиот совет потпретседателот Селим Адеми побара претседателката Весна Дамева да биде разрешена. Тој обвини дека таа го криела писмото од американската амбасадорка Анџела Агелер и не го покажала пред останатите членови на Советот. Дамева, пак, се бранеше дека била на одмор, и рече дека тој како нејзин заменик требало да го даде на увид писмото пред останатите колеги. Дамева настапи со контраобвинување велејќи дека Адеми има други мотиви за нејзино разрешување.
„Претседателке, нè ставивте во заблуда затоа што писмото од амбасадорката на Америка не ни е доставено на време туку по две недели. Кој го криел писмото?“, праша Адеми. „Дали може писмо од амбасадорка да чека две недели? Сите да го имаат, а ние да го слушнеме од медиумите? Дали одредени портали кажуваат име и презиме? Вие денеска за ваква информација, со име и презиме да се пишуваат членови, да се шири хронолошки, за доверлив материјал, Вие најмалку требаше да кажете: ‘Јас, колеги, не сум го кажала тоа, ви кажувам искрено’. Но, кој го направил? Првиот човек треба да има одговорност“, рече Адеми.
Дамева посочи дека се согласува со содржината на писмото од американската амбасадорка но му одговори дека вистинската причина што тој бара нејзино разрешување е затоа што ќе има утврдување на одговорност на судии.
„Сега се отвора Пандорината кутија со недокажани реченици, со флоскули, со извртени факти и апсолутно неаргументирани. Ќе ве демантирам за писмото од Агелер, кое ниту се криело ниту имало намера да се крие. Моите заложби се тие, да се подобри состојбата во судството, да се постигне самостојност и независност најпрвин кај членовите на Судскиот совет, а потоа кај судиите. Првин членовите да постигнат интегритет, потоа судиите. Јас сум разочарана и се согласувам со содржината. Судскиот совет како да влегува во амбис, како да се сака да се растури тело во кое членовите се поделени во смисла на гласањето. Тоа некому не му одговара. Писмото е стигнато на 11-, наредниот ден бев на одмор. Зошто писмото стигнато на 11 не го презентиравте кај колегите? На крајот, 17 беше неработен ден, 18 – седница. Ова не е за да се правдам оти немам намера, но стојам зад сите заложби на меѓународната заедница дека не сме на прав пат. Без разлика дали има писмо или не. Потоа го поделив писмото во копија. Овој претседател ќе се бори да бидат разрешени нечесни судии и да бидат избрани најдобрите“, рече Дамева.
Адеми продолжи дека претседателот на Судскиот совет треба да биде од редот на судиите.
„Има и одлука на Уставниот суд, со која одредува дека претседател може да биде само член од редот на судиите. Ред е да се почитува и таа одредба, можеби е дојдено времето претседател на Судскиот совет, па и заменик да биде од редот на судиите“, посочи потпретседателот.
„И да си одам и да го изгласате моето разрешување, ако има законски основ, ќе си одам. Но, со гордо крената глава. За овие четири месеци, признале или не, овој Судски совет се отвори за јавноста, има добра работа со меѓународната заедница. Ако не сакаме на европскиот пат, сакаме да одиме по патот на заборав. Додека сум претседател, нема да има простор за влијание. Не се плашам од притисоци и закани, па по цена и да си одам. Ако ова е крајот, треба да утврдите моја одговорност, па да наведете основ зошто ми го одземате мандатот, а не поради ваши желби и желби на ваши блиски луѓе“, реагираше Дамева.