Трчање, пукање, самоконтрола. Ова се трите најважни услови за одлични резултати во биатлон. Сите се обединети во Белорусинката Дарја Домрачева која се прослави на зимските олимписки Игри во Пјонгчанг со освоеното злато во штафетната трка 4х6 километри. Заедно со сонародничките Надежда Скардино, Џинара Алимбекава и Ирина Кријуко пристигнаа на целта пред Французинките и Швеѓанките и на својата земја ѝ го осигураа најсјајното одличје во Јужна Кореја.
Но, трофејот на Игрите не е единствена причина што Домрачева привлекува внимание. Биатлонката од Минск е поранешна агентка на КГБ, разузнувачка служба на Белорусија што го задржа името од Советскиот сојуз, па затоа и нејзиниот настап во штафетета се следеше со особен интерес на светските медиуми. Шестото олимписко одличје што го освои во кариерата, трето за нејзината земја во Пјонгчанг, многумина го поврзуваат со стекнатите вештини надвор од патеката и позицијата на која беше до 2014 година.