Со традиционалното палење на фестивалскиот оган и рецитирањето на незаменливата „Т’га за југ“ на Константин Миладинов, во Домот на поезијата во Струга свечено започна 65-тото издание на најпрестижната поетска манифестација во светот – Струшките вечери на поезијата.
Под мотото „Каде што живее поезијата“, Струга уште еднаш ги обедини поетите од сите меридијани, испраќајќи моќна порака дека поезијата сè уште има сила да обединува, да инспирира и да го брани човечкото достоинство.Отворајќи го фестивалот, претседателката на државата Гордана Сиљановска-Давкова и министерот за култура и туризам Зоран Љутков испратија силни пораки за суштинското значење на јазикот и книжевноста за опстојувањето на една држава и народ.
Во тој дух, директорот на фестивалот, Никола Кукунеш, во своето обраќање нагласи дека јазикот не смее да остане само празно ехо од минатото, туку мора да пулсира како жив глас во иднината.
Лауреатка на годинашниот „Златен венец“, највисокото признание на фестивалот, е еминентната холандска поетеса Анеке Брасинга. Во нејзина чест беше засадено дрво во Паркот на поезијата, со што традиционално и започна официјалната програма. Брасинга изрази длабока благодарност, истакнувајќи дека е трогната од вниманието и дека како прв холандски поет што ја добива оваа награда, тоа за неа претставува огромна чест, но и признание за целата холандска поезија. Таа додаде дека многу поети од други култури, како Данте, Шекспир и Чехов, се преведени на холандски јазик, бидејќи како мала јазична заедница, тие отсекогаш се хранеле со она што се создава на другите јазици, а таквата размена носи единствена космополитска слобода.
Годинава на ова јубилејно издание учествуваат околу 70 поети, критичари, преведувачи и литературни работници од земјава и светот, а добитник на наградата „Мостови на Струга“ е Даниел Џандс од Обединетото Кралство.
Фестивалската програма продолжува со поетски читања на авторите кои влегоа во потесниот избор за наградата „Браќа Миладиновци“, како и со авторски портрет на минатогодишната добитничка на ова признание, Јулијана Величковска. Воедно, предвидени се промоции на нови поетски изданија и меѓународни поетски читања, а во вечерните часови ќе се одржат и традиционалните „Ноќи без интерпункција“, како еден од најпрепознатливите сегменти на фестивалот. Струга и во следните денови останува светска престолнина на убавиот збор, славејќи ја вечната моќ на поетскиот израз.
Извор: ТВ 24.мк