Актерот Ристо Шишков не бил клеветен од неговиот колега Петар Арсовски, потврди Апелацискиот суд Скопје, по цели девет години судење, објави Правосудство.
Арсовски успеа да докаже дека поранешниот портпарол на ВМРО-ДПМНЕ, Оливер Шамбевски го клеветел со намера да му го наруши неговиот углед и чест.
Тужбата која беше поднесена против Шамбески уследи по одржана партиска прес-конференција, на 26 февруари 2009 година на која портпаролот на ВМРО ДПМНЕ кажа дека Петар Арсовски директно учествувал во конструкцијата на обвинението против неговиот колега Ристо Шишков. Шамбевски обвини дека во 1979 година, Арсовски го клеветел Шишков дека го напаѓал тогашниот комунистички режим и дека токму поради дадените изјави Шишков бил осуден и затворен.
Судот му наложува на Шамбевски да плати надомест на штета од 120 илјади денари и да ги надомести трошоците на судската постапка, која траеше девет години поради непојавувањето на тужениот на суд, иако беше познато дека тој е во Амбасадата на Македонија во Пекинг, Кина.
Застапникот на Шамбевски, адвокатот Александар Михајловски, сега познат по барањето за реформи во ВМРО-ДПМНЕ, одрекуваше дека неговиот клиент ги избегнува судските покани. За него беше спорно тоа што судот покани ги испраќал до седиштето на партијата, а тужениот не само што заминал за Кина, туку бил именуван и за амбасадор.
-Задоволен сум, бидејќи се потврди дека јас никого не сум кодошел. За мене најважна е вистината! Да бидам искрен мене ништо не ми значи и одредениот надомест за претпрена штета. Битна ми е само вистината, вели актерот Арсовски и појаснува дека на тужениот Оливер Шамбевски, преку неговиот застапник, кој и претходно го контактирал, му било кажано дека доколку тужениот се согласи јавно да го демантира она што веќе го изјавил и притоа се извини тој е подговен да ја повлече тужбата и да не бара никаков надомест за претрпената штета. Тужената страна се согласила на повлекување на тужба, но не и да признае дека клеветела и затоа и е одбиено барањето за извинување.