Специјалната јавна обвинителка Катица Јанева по денешното апсење треба да биде однесена во Кривичниот суд каде што ќе треба да даде исказ и пред судија на претходна постапка.
Јанева беше уапсена попладнево по налог на Обвинителството за организиран криминал и корупција каде вчера даде исказ за случајот „Рекет“. Бројни новинарски екипи се пред Судот.
НОВА неофицијално дознава дека по апсењето таа заедно со истражителите од Обвинителството за организиран криминал се во СЈО каде се врши претрес во нејзината канцеларија и автомобилот што го користела.
На 8 август италијанскиот весник „Ла Верита“ објави видео-снимка во врска со случајот „Рекет“.
Видеото е од средба на осомничените во случајот „Рекет“, Бојан Јовановски (Боки 13) и Зоран Милески (Кичеец) со бизнисменот Јордан „Орце“ Камчев, а било снимено во февруари годинава. На снимката се гледаат спакувани евра со рачно испишани спецификации на листови хартија, а како што наведува весникот, се слуша и разговор на Јовановски и Камчев за предмет на СЈО во кој ја спомнуваат и специјалната јавна обвинителка Катица Јанева.
Во следните аудио снимки се слуша и гласот на Јанева.
Јанева тогаш изјави во интерес на предистрагите и истрагите кои се водат во СЈО повеќе пати разговарала со разни лица, во обид да се издејствуваат подобри позиции во кривичните предмети, а тоа често се случувало да се одвива преку од нив назначени посредници. Во тој период водела разговор и со Камчев за да стане соработник – сведок во нова предистрага.