Специјалната обвинителка Катица Јанева во изјавата по распитот во Обвинителството за организиран криминал и корупција за случајот „Рекет“, рече дека била повикана како сведок. Таа го напушти обвинителството придружувана од адвокатот Стеван Павлески кој беше со неа на распитот. За Јанева не е спорно што повикала адвокат со неа и Павлески бил нејзин правен консултант.
Јанева рече дека не чувствува вина и дека очекува во текот на судскиот процес да се расчисти случајот „Рекет“. Потврди дека и се одземени два мобили телефони кои ги користела, кои сега се на анализа, но негираше дека биле форматирани, односно дека се избришани податоците од нив. Јанева додаде дека имала и трет телефон и тој е изгубен.
Одби да одговори на прашањата поврзани со „Рекет“ – дали е нејзин гласот на објавените снимки, дали знае каде е Орце Камчев, дали знае каде се парите и дали има инволвирани политичари во случајот. На сите овие прашања рече дека се работи за истрага и во оваа фаза од постапката не се откриваат детали. Обвинителката Русковска ќе одлучи дали истрагата ќе се прошири и со специјалната јавна обвинителка, рече Јанева на прашањето дали и таа ќе биде меѓу осомничените.
Во врска со изјавата на обвинителката Лиле Стефанова во која таа ја обвини Јанева дека барала Орце Камчев и другите осомничени во „Империја“ и осомничените и предметот „Поштенска банка“ да бидат ослободени со тоа што ќе платат оштета, Јанева само кажа дека „за тоа има време кога ќе се објасни“.
Адвокатот Павлески кој стоеше зад Јанева неколку пати и посочи дека таа не е на распит за да одговара на сите новинарски прашања.
Досега во Обвинителството искази дадоа тројца обвинители од СЈО, Лиле Стефанова, Елизабета Јосифоска и Бурим Рустеми. Вчера на распит беше донесен второосмничениот Зоран Милески, како и пензионерката Лилјана Тодоровски, која е потписничка на проектот за европски центар на Меѓународниот сојуз на Бојан Јовановски – Боки 13.
Катица Јанева и Лиле Стефанова беа спомнати во аудио снимките и видеата што ги објави италијанскиот весник „Ла Верита“, а во врска со случаите „Рекет“ и „Империја“.
Јанева во трето продолжение на Ла Верита: Лиле не може ништо без мене
ВИДЕО Јанева во Обвинителството за „Рекет“: Со моите аргументи ќе ја забрзам истрагата