По два часа распит во полициската станица Автокоманда, Александар Василевски – Нинџа е пуштен.
Во изјава за ТВ 24 тој вели дека бил случајно сопрен на улица додека се возел со својот пријател, Блаже Петровски, вработен во Шестата управа и вели дека го претресувале „Алфи“ и му барале лична карта, го проверувале дали има нешто недозволено.
Потоа бил качен во посебно полициско возило, однесен во полициска станица, а што се случило со Петровски не знае.
Како што објави НОВА претходно, Нинџа и Петровски, кој беше суспендиран поради настаните на 27 април во Собрание, беа приведени попладнево и однесени во станицата во Автокоманда.
Петровски носел приватен револвер, наполнет со муниција, што е спротивно на законот. Запрени се со возило Мерцедес кај Основното училиште “Стив Наумов” во Автокоманда. Полицијата му го одзела службеното оружје на Петровски.
Александар Василевски-Нинџа се појавува и на видео снимките од крвавиот четврток, мешу насилниците кои себе носеа фантомки и ја насочуваа толпата кон пресс салата каде што беа пратениците на мнозинството. Тој се поврзува со криминалното подземје и со поранешниот прв човек на УБК Сашо Мијалков.Нинџа до сега неколку пати е осудуван и има издржувано казна затвор.
Тој се споменува во два случаи последниве години „Ровер“ и „Детонатор“.
Во случајот „Ровер“ во 2013 година тој беше сведок против 15 обвинети за убиство и помагање убиство на Марјан Тушевски и Kире Јанев во јули 2001 година, меѓу кои и екс министерот Љубе Бошковски.
Во мај 2013 година Скопска Апелација го ослободи од обвинението за оружен напад врз Драганчо Стојменов, кој е клучен сведок во акцијата “Детонатор“, откако претходно Нинџа беше осуден од Кривичниот суд на десет месеци затвор. Инцидентот се случил во декември минатата година, кога според тогашната истрага на МВР, тој со уште едно лице го нападнале Стојменов, кој полесно беше повреден во десната нога. Тоа беше четврти по ред напад врз Стојменов кој беше мета на бомбаши кои поставија два пати бомба под неговиот автомобил. Последниот обид за ликвидација на Стојменов, полицијата не го поврза со претходните случаи, бидејќи двајцата напаѓачи што нападнатиот посочил дека пукале кон него не биле поврзани со обвинетите од Кочани и Виница.