Close Menu

По подолго време: Македонија падна под 1.000 активни случаи на ковид-19

0
By on ПОЛИТИКА

Бројот на активни случаи на ковид-19 во земјата по подолго време е под 1.000, но речиси двојно повеќе беше вчерашната бројка на нови случаи за разлика од претходниот ден кога беа регистрирани 16 лица. Од направените 3.856 тестови, вчера беа регистрирани 29 позитивни резултати на коронавирус.

На инфективните одделенија во главниот град и во болниците низ земјава се лекуваат вкупно 134 позитивни и суспектни пациенти на коронавирусот, а во ковид центрите има околу 515 слободни болнички кревети.

На вакциналните пунктови во државата, според последните податоци, се вакцинирани вкупно 245.413 граѓани. Во државата вкупно се аплицирани 384.466 дози вакцини, а ревакцинирани се 139.053 лица.

Со последните бројки, 48 отсто од населението над 70 години има примено барем една доза вакцина и 35 отсто од населението над 60 години е вакцинирано со барем една доза вакцина. 

Од Министерството за здравство (МЗ) информираат дека во текот на вчерашниот ден се регистрирани 50 оздравени пациенти, а пријавени се вкупно шест починати лица на возраст од 40 до 95 години.
Вкупната бројка на ковид-дијагностицирани лица во нашата земја од почетокот на епидемијата изнесува 155.407, бројката на оздравени пациенти е 148.960, на починати е 5.448, а бројот на активни случаи изнесува 999.
Од МЗ соопштија дека вакцинацијата се одвива непречено на сите пунктови низ државата, како и дека интересот за вакцинација секојдневно се зголемува, а досега бројот на лица кои изразиле желба за вакцинација преку веб платформата vakcinacija.mk е 440.213 граѓани.

Масовна вакцинација се одвива во неколку градови во државата и тоа во А1 СЦ Борис Трајковски во Скопје, во спортските сали во Кавадарци, во Куманово, во Тетово, во Штип, во Битола, во Струмица, во Охрид, во Велес и во Прилеп.

Share.