Главниот комитет на Демократската партија на социјалистите (ДПС) на Црна Гора на денешниот состанок ја прифати оставката на досегашниот лидер на партијата Мило Ѓукановиќ и едногласно го поддржа неговиот наследник Данијел Живковиќ, кој функцијата ќе ја врши со в.д. статус. Живковиќ е шеф на пратеничкиот клуб на ДПС.
Главниот одбор на ДПС денеска расправаше за организацијата на партискиот конгрес на кој ќе се избираат новиот претседател и раководството, како и за подготовката за претстојните вонредни парламентарни избори закажани за 11 јуни.
Одлуката за повлекување и од партиското кормило по поразот во вториот круг од изборите за претседател на Црна Гора на 2 април, Ѓукановиќ ја соопштил вчера на претседателството на партијата.
Црногорските медиуми велат дека таа одлука беше очекувана затоа што лидерот на ДПС ја најави за време на кампањата за претседателските избори.
Ѓукановиќ со кратки прекини е неприкосновен претседател на партијата од 1997 година и распадот на тогашната обединета ДПС.