Терористичките напади на јеменските Хути врз трговски бродови, кои во Црвеното Море пловат кон Израел, ги разгореа конфликтите на Блискиот Исток. Воените воздухопловства на САД и на Британија, соодветно одговорија на нападите врз оваа паравоена структура стационирана во Јемен , а која од страна на меѓународната организација, исто како и палестинскиот Хамас, е прогласена за терористичка организација.
Официјално, Хутите се позната како „Ансар Алах“ или божји помошници и се шиитска политичка и воена организација формирана во 1990 година во Јемен од верскиот водач Хусеин ел-Хути кој во 2004 година е убиен од јеменската војска.
Организацијата на Хутите со оружје е снабдувана од либанската шиитска политичка и воена организација Хезболах. Дејствуваат под слоганот „Бог е голем, смрт на Америка, смрт на Израел, клетва на Евреите, победа на исламот“.
Исто како Хамас и Хезболах, и Хутите се поддржани од Иран и се дел од таканаречената иранска оска на отпор против Израел и САД, вклучително и против Саудијска Арабија.
Поголемиот дел од населението во Јемен живее во области под контрола на Хутите. Во рамките на државата Република Јемен, организацијата на Хутите собира даноци, печати пари и го контролира јавниот живот на тамошното население.
Според ООН, Хутите кои во Јемен практично водат граѓанска војна, до 2010 година имале речиси 120 илјади вооружени следбеници.