Руската делегација при руско-украинските разговори во Истанбул објави два чекора за деескалација на конфликтот кон Украина по првиот ден од разговорите, објави руската државна новинска агенција РИА-Новости.

РИА, повикувајќи се на руската делегација, рече дека чекорите вклучуваат „драстично намалување на воената активност во насоките Киев и Чернигив“, како и можност за средба меѓу рускиот претседател Владимир Путин и украинскиот претседател Володимир Зеленски истовремено со парафирањето на мировниот договор од страна на министрите за надворешни работи на двете земји.

Шефот на руската делегација, помошникот на претседателот Владимир Медински, ги нарече преговорите „конструктивни“, пренесе РИА.

Рускиот Генералштаб ќе објави повеќе детали за чекорите за намалување на непријателствата во Украина по враќањето на руската делегација од разговорите во Истанбул, изјави рускиот заменик министер за одбрана Александар Фомин за руската државна новинска агенција ТАСС.

Во меѓувреме, советникот на украинскиот претседател Михаило Подољак, рече дека е постигнат доволен напредок за време на разговорите меѓу руската и украинската делегација за да им се овозможи на Путин и Зеленски да се сретнат. Говорејќи во Истанбул по разговорите меѓу двете страни во вторникот, Подољак рече дека сега постои „веројатност“ двајцата претседатели да се сретнат.

„Сега имаме подготвени документи кои им овозможуваат на претседателите да се состанат на билатерална основа“, рече тој. Разговорите меѓу двете страни „ќе продолжат онлајн 24/7“, рече Подољак, додавајќи дека на Украина и треба „јасна правна формулација“. „Руската делегација е конструктивна и свесна. Ова не значи дека преговорите се лесни. Тие се многу тешки. Но, руската страна обрнува внимание како на руските така и на украинските предлози“, додаде тој.