Експресно е решен проблемот со недостиг на ленти за дијабетичарите.
Информацијата за НоваТВ ја потврди претседателот на Сојузот на дијабетичари, Диме Велев. Тој вели дека лично се уверил оти дистрибутерот попладнево испорачал 2000 кутии со ленти до инсулинските амбуланти низ земјава.
За проблемот со недостиг на ленти за инсулин до нашата редакција се пожалија пациенти со дијабетес, кои ни рекоа дека подолг период не можеле да добијат ленти заедно со терапијата.
Од Министерството за здравство пак во одговор на нашето прашање признаа дека имало застој во дитрибуцијата на ленти до инсулинските амбуланти.
„Пациентите со дијабет навремено ја добиваат потребната терапија и има доволно количини инсулинска терапија за сите пациенти. Во однос на обезбедувањето ленти, постоеше мал технички застој при транспортот, кој веќе е надминат и од утре непречено продолжува редовната дистрибуција на инсулински ленти“, ни одговорија од Здравство.
Претседателот на Сојузот на здруженија на дијабетичари, Диме Велев, во разговор за НоваТВ најави дека од надлежните ќе побараат нова методологија за набавка на помагала, по примерот на земјите од регионот како Србија и Хрватска.
„Го подготвуваме барањето. Ќе го поднесеме до Владата и до Министерството за здравство. Бараме како и во другите земји во регионот, пациентите да добиваат потврда за помагало, да може секој пациент да си оди во најблиската аптека и да си купи ленти по сопствен избор. Колку ќе покрие државата, толку. Барем да бидеме обезбедени, да знаеме дека сами си бираме“, вели за НоваТВ, Велев.
Инаку, кутивче со ленти за мерење на гликемија во аптеките чини од 600 до 1200 денари зависно од производителот.
(Б.Божиновска)