Моќниот тропски циклон „Вероника“ проследен со силен ветар и поројни дождови го погоди северозападниот брег на Австралија. Како што соопшти австралиската метеоролошка служба, ветрот што на места дувал со брзина и до 154 километри на час предизвика бранови високи по неколку метри што, заедно со поројниот дожд, поплавија делови долж крајбрежјето.
Властите прогласија „црвено“ ниво на опасност од појава на поплави и апелираа до граѓаните да најдат сигурни засолништа од ветерот. Од циклонот најтешко е погоден градот Порт Хедланд, кој е еден од најголемите центри во светот за извоз на железна руда.
„Вероника“ е втор циклон што ја погодува Австралија викендов, откако вчера северното крајбрежје на државата го погоди и ураганот од четврта категорија „Тревор“, исто така, проследен со поројни дождови и силен ветер со брзина и до 250 километри на час.
Австралиските медиуми јавија дека ова е вторпат во историјата на земјата во исто време да е погодена од два циклони.