Со голема тага ја примивме веста за заминувањето на големиот уметник Омер Калеши, кој повеќе од педесет години живееше и твореше во Париз, објави македонската амбасада во француската престолнина.
Омер Калеши беше и ќе остане симбол на балканскиот мултикултурализам, искрен поборник за мир и соживот, автор со автентичен стил и универзална порака која остави длабок печат во современата европска уметност и ќе претставуваат неисцрпна инспирација за хуманост, љубов и почит, се додава во објавата.
Омер Калеши е роден во 1932 година во кичевското село Србица, матурирал во средното техничко училиште во Скопје, во 1965 ги завршува студиите на Ликовната академија во Истанбул, а од 1965 живееше и твореше во Париз. Автор е на над 600 дела кои ги има изложувано во најголемите европски метрополи, одликуван е со Медал за заслуги за Македонија, добитник е на наградата „Мајка Тереза“ во 2018, и е почесен член е на МАНУ. (Р.Н.)