Собранието попладнево ја започна седницата за реконструкција на Владата. На дневен ред на 104. седница се предлогот за разрешување и за избор на нови членови на Владата, како и предлози за разрешување и за избор на заменици на министри.
Дневниот ред на седницата е усвоен со 64 гласа „за“, од 115 присутни пратеници. Против и воздржани немаше.
Премиерот Димитар Ковачевски во своето обраќање на почетокот на седницата ја потенцираше, како што рече, потребата за стабилност и за врвните интереси на државата. Ковачевски на почетокот на седницата изрази сочувство за загубите на човечките животи во земјотресите во Турција и Сирија.
Координаторот на пратеничката група на ВМРО-ДПМНЕ, Никола Мицевски рече дека врз основа на член 221 од Деловникот, на дневниот ред разрешувањето на министрите требале да бидат поединечно, најавувајќи дека пратениците од опозицијата активно ќе дискутираат на седницата.
Со реконструкцијата во Владата на премиерот Димитар Ковачевски влегува Алијансата за Албанците, а излегува Алтернатива.
Претпладнево на седница на Собранието беа констатирани оставките на министрите за правда Никола Тупанчески и за животна средина и просторно планирање Насер Нуредини, а во рамки на 104. седница останува да бидат разрешени тројцата министри од Алтернатива – за здравство Беким Сали, за информатичко општество и администрација Адмирим Алити и Џемаил Чупи, министер без ресор задолжен за дијаспора, кои најавија дека нема да присуствуваат на заседанието.
Нови министри ќе бидат Кренар Лога за правда, Фатмир Меџити за здравство, Азир Алиу за информатичко општество и администрација, сите тројца од редовите на Алијанса за Албанците, како и на Каја Шукова од СДСМ за животна средина и просторно планирање.