Милиони муслимани денеска го започнуваат аџилакот, во кој луѓе од разни земји се упатуваат кон светиот град Мека, во Саудиска Арабија, за извршување серија ритуали и молитви за чистење на гревовите.
Според Исламот, сите муслимани барем еднаш во животот треба да извршат аџилак – еден од петте основни столба на муслиманската религија, вклучително верба во Алах и пророкот Мухамед како негов последен заповедник, петдневни молитви со лице свртено кон џамијата Каба во Мека, дарување барем еднаш годишно и почитување на рамазанските пости.
Аџилакот започнува во Мека, пред верниците да продолжат кон долината Мина, на неколку километри на исток, каде е поставен голем град под шатори. Главен момент е поклонување со молитви на ридот Арафат.
Саудиска Арабија годинава мобилизира над 100.000 полицајци, што ќе се грижат за безбедноста за време на аџилакот.
Годинава аџилакот ќе трае до 14 септември.
Поради тоа што овој процес промовира еднаквост и скромност, верниците носат едноставна бела облека позната како – ихрам.
Изминативе години се случиле повеќе смртоносни стампеда за време на аџилакот, кога огромен број луѓе се собираат на петдневниот настан.
Најтешката катастрофа се случи во 1990-та година кога во стампедо во тунел во Мина загинаа преку 1.400 лица. Во стампеда во 1994, 2004 и 2006-та година животото го загубија преку 200 аџии.
Саудиска Арабија во минатото, особено за време на смртоносниот вирус ебола, не им дозволи влез на муслиманите од Гвинеја, Либерија и Сиера Леоне, односно земјите кои беа најтешко погодени од вирусот.