Фестивалот на нов европски филм – „Бич филм фестивал Охрид“ (Beach Film Festival Ohrid), што веќе осум години нуди врвна филмска програма на повеќе локации долж охридското крајбрежје, оваа година вклучува и слатко изненадување – летно загревање пред да започне официјалната програма, информираат организаторите на настанот.
Во соработка со Гете-институт – Скопје, публиката ќе има можност да погледне седум современи германски филмови. Секоја вечер од денеска до 6 јули, со почеток од 20:30 часот, ќе се прикажуваат внимателно избраните филмови, секој од нив уникатен и забавен на свој начин, се посочува во соопштението.
Вечерва ќе се прикажува филмот „Два спрема еден“ („Zwei zu eins“) утре – „Френки со пет ѕвезди“ („Franky Five Star“), в петок – „Јоња“ („Jonja“) и „Утре некаде покрај море“ („Morgen irgendwo am Meer“), в сабота ќе може да се погледнат „Пливање“ („Schwimmen“) и „Надвор од мојата кожа“ („Aus Meiner Haut“), а в недела – „Обичните“ („Die Gewöhnlichen“).
Ова е одлична можност за сите љубители на европската кинематографија да се воведат во фестивалската магија што следи. Под отворено небо, со свежо ветре покрај езерото, нема подобар начин да се пројдат топлите јулски вечери, истакнуваат организаторите.