За денеска е закажно првото рочиште за предметот „Таргет-Тврдина“ во кој обвинети се поранешните министерка за внатрешни работи Гордана Јанкуловска и директорот на УБК Сашо Мијалков, неговиот шеф на кабинет, Тони Јакимовски, како и бегалците Горан Грујевски (поранешен началник на Петтата управа во УБК) и и Никола Бошкоски (вработен во УБК).
Меѓу вкупно 12-те обвинети е и Владимир Варелов, исто така, вработен во УБК од кого Грујевски го зеде идентитетот за да избега. За „Таргет-Тврдина“ досега имаше едно рочиште, но тоа беше одложено поради отсуство на еден од адвокатите на Мијалков. Сега предметот ќе почне од почеток бидејќи според новиот распоред на судот, повеќе нема да го води судијката Ленка Давиткова туку Џанета Бегтовиќ.
По денешното судење за овој предмет, кој директно е поврзан со нелегалното прислушување, до крајот на февруари засега се закажани вкупно 24 рочишта за предметите на СЈО. Во четврток е закажано рочиште за „Труст“ во кој меѓу обвинетите е бизнисменот Сеад Кочан.
Груевски за првпат годинава треба да се појави на судење наредната среда, на 24 јануари, како обвинет во случајот „ТНТ“ за рушењето на комплексот „Космос“ на Фијат Цаноски. Покрај него, меѓу вкупно седумте обвинети се и екс министерот за транспорт и врски Миле Јанакиески и поранешниот градоначалник на Гази Баба Тони Трајковски.