Министрите за надворешни работи на земјите членки на Повелбата за партнерство меѓу Македонија, Албанија, Хрватска, Црна Гора, Босна и Херцеговина и САД, и набљудувачите Словенија, Србија и Косово, денес во Скопје учествуваа на состанокот на Партнерската Комисија, со кој претседаваше министерот за надворешни работи, Никола Димитров.
Од министерството соопштуваат дека учесниците размениле мислења за актуелната политичка состојба во регионот и безбедносните предизвици, реафирмирајќи ја посветеноста и заедничките напори насочени кон стабилна и просперитетна Југоисточна Европа.
На состанокот се разгледале и различните аспекти на досегашната и идната соработка на земјите од Повелбата, со посебен акцент на натамошните заеднички активности во повеќе области, а пред се нивниот придонес во зајакнувањето на безбедноста на регионален и глобален план како и иницирање заеднички проекти со останатите облици на регионална соработка.
Димитров го истакнал значењето на САД – Јадранската повелба за промовирање и зајакнување на мирот, безбедноста и соработката во ЈиЕ и ја реафирмирал определбата и заложбите на Република Македонија за натамошно продлабочување на соработката во рамките на Повелбата, со цел заокружување на европските и евроатлантските интеграциски процеси на регионот.
Притоа ја потенцирал и пораката од американскиот претседател Доналд Трамп, соопштена од потпретседателот Мајк Пенс, дека иднината на регионот е во НАТО и Европската унија и дека САД ги поддржуваат и се трајно посветени на овие процеси, кои ќе ја зајакнат Европа.
На состанокот, новоименуваниот Национален координатор за НАТО, Стево Пендаровски, во име на Премиерот на Македонија ги пренел неговите пораки за растечкото значење на САД – Јадранската повелба за регионот и неговата европска и евроатлантска интеграција.
Министерот Димитров, подвлекол и дека оваа 2017 година е историска година и за Македонија, во која новата реформска Влада е силно посветена на имплементацијата на сите стандарди на НАТО и ЕУ и планот 3-6-9 и засилено работи на обновување на институциите, на враќање на меѓународната положба и углед на Македонија, на вредностите на демократијата, слободата и владеењето на правото.
Земјите членки дале силна и експлицитна поддршка на Република Македонија за добивање полноправно членство во НАТО во најкус можен рок и дека тоа треба да се случи шо е можно поскоро.