Судбината на најмалку 101 лице е непозната, додека 78 се повредени во напад на подморница врз ирански брод покрај брегот на Шри Ланка, изјавија за Ројтерс извори во морнарицата и Министерството за одбрана на Шри Ланка.
Претходно, министерот за надворешни работи на Шри Ланка, Виџита Херат, објави дека неговата земја спасила 32 „сериозно повредени“ морнари од иранска фрегата што потона денес надвор од територијалните води на островот.
Министерот не ги прецизираше причините за експлозијата на овој воен брод.
Екипаж од 180 луѓе се наоѓал на иранската фрегата „Ирис Дена“ кога воениот брод испратил СОС порака денес во зори , според министерот, кој ги дал овие појаснувања додека зборувал во парламентот.
Министерството за одбрана на Шри Ланка објави дека спроведува потрага по други членови на екипажот на фрегатата, која потона околу 40 километри јужно од Шри Ланка, во Индискиот Океан.
Продолжуваме со потрагата, но сè уште не знаеме што се случило со остатокот од екипажот, изјави за АФП друг портпарол во Шри Ланка, додавајќи дека има мали шанси да се пронајдат уште преживеани.
Херат соопшти дека два брода на морнарицата на Шри Ланка и еден авион се распоредени за спасувачката операција, без да ги прецизира причините за потонувањето.