Вкупно 27 тужби поднеле партиите ноќеска до Управниот суд против решенијата на Државната изборна комисија (ДИК) за приговорите за првиот круг од локалните избори што се одржаа во неделата, објави МИА. Рокот за поднесување тужби истекува во 11 часот.

ВМРО-ДПМНЕ поднела 24, две поднела ТМРО и една поднела Левица.

Лидерот на ВМРО-ДПМНЕ, вчера во интервју на телевизија „Алфа“ рече дека овие избори биле најнедемократските досега.

„Имаше страшен терор, уцени, закани, заплашување и многу поткуп на гласачите од страна на актуелната власт во досега невидени размери. Сево ова се случувало и во минатото на други избори, но во вакви размери, јас не се сеќавам дека имало во Република Македонија. Практично, имавме убиен човек во изборите, кандидат за градоначалник и актуелен градоначалник со скршен череп, искршени изборни штабови. Кога се случува сето ова, можете да замислите што се си помислува обичниот човек. Ова беа африкански избори“, рече Груевски.

Судечките совети на Управниот суд по овие тужби треба да се изјаснат 48 часа од нивното поднесување. По тужбите ќе одлучуваат пет судечки совети составени од по петмина судии од Управниот суд избрани по пат на жрепка. Тужбите електронски им се распоредуваат на судиите, а одлучувањето ќе биде на јавни седници.

Управниот суд синоќа ја отфрли тужбата од Ѓорѓи Шарковски против државната администрација во Кривогаштани заради оневозможување на собирање потписи за градоначалник и членови на совет во Општина Кривогаштани. Решението го донесе Управениот суд во совет составен од тројца судии.

Во меѓувреме тече кампањата за вториот круг од изборите. Ноќеска на полноќ заврши рокот за поднесување барања за гласање на болни и изнемоштени лица.

Вториот круг од локалните избори е на 29 октомври.