По истражна постапка што се спроведуваше од 13 декември минатата година, Основното јавно обвинителство за гонење на организиран криминал и корупција поднесе обвинение против 11 лица за злосторничко здружување. Првообвинетиот С.Џ. (47) сторил и кривични дела прикривање, оштетување или уништување предмети под привремена заштита или културно наследство или културни реткости, изнесување во странство на предмети под привремена заштита или културно наследство или природни реткости и незаконско изработување, држење, посредување и тргување со оружје.
Како што соопшти државното Јавно обвинителство, петмина обвинети З.А.(39), М.С.(42), Г.К.(45), И.С.(48),и М.Џ.(37), освен за злосторничко здружување, се товарат и за оштетување или уништување добра под привремена заштита или културно наследство или културни реткости.
М.А.(32) и Д.Р.(36) се обвинети и за изнесување во странство на предмети под привремена заштита или културно наследство или природни реткости. Покрај злосторничко здружување и прикривање, на обвинетиот Т.А.(58) му се става на товар и оштетување или уништување предмети под привремена заштита или културно наследство или културни реткости, додека на Н.М.(48) – кривичното дело изнесување во странство на предмети под привремена заштита или културно наследство или природни реткости.
Најмладиот Р.З.(28,) според обвинението, покрај злосторничкото здружување е сторител и на кривичните дела оштетување или уништување на предмети под привремена заштита или културно наследство или културни реткости и изнесување во странство на предмети под привремена заштита или културно наследство или природни реткости.
Обвинителството информира дека во втората половина на 2021 година на територијата на државава, со цел вршење на наведените кривични дела и стекнување противправна имотна корист, обвинетите С.Џ., З.А. и Т.А. создале група во која припадници станале останатите обвинети и Д.П кој е во бегство.
„Групата станала функционална и нејзините припадници во периодот од 1 декември 2021 до 12 декември 2022 година неовластено истражувале археолошки локалитети, користејќи карти и рачно пишани текстови и преданија за ориентација и пронаоѓање на археолошките локалитети. По пронаоѓање на локалитетите, со користење метал детектори обвинетите извршувале недозволено истражување и ископување на предмети од културно наследство. Иако знаеле дека потекнуваат од извршено кривично дело, археолошките и историските предмети ги присвојувале и ги криеле во нивните домови или на непознати локации и незаконски ги продавале на заинтересирани купувачи од земјата и странство, наведува Обвинителството.
Отуѓените предмети се со археолошки, етнолошки, уметнички и историски вредности со непроценлива вредност, се сопственост на државата и се со исклучителна вредност.
„Со нивно одземање, обвинетите сториле трајна штета за археолошкото, историското, музејското и уметничкото истражување на надлежните државни и научни институции и штета на државата“, соопшти обвинителството.