„55 години седевме и чекавме во тремот и не наоѓајќи некој да се погрижи некој за нас. Потоа ни пристапи друг човек, нашиот собрат денешниот сослужител неговата светост српскиот патријарх Порфириј и еве сега имаме и кој да ни нацрпи вода од кладенецот на Јаков и сите ќе видат колку е нашата нива плодна и дека посеаното стигна за жетва“, рече денеска поглаварот на МПЦ-ОА г.г. Стефан.

Сега, додаде тој, целосно ги гледаме сите убавини на рајот затоа што имаме со кого да ги споделиме и не тагуваме веќе како Адама туку се радуваме како апостолите на денот на педесетицата опиени од слаткиот пијалак на заедницата и братската љубов. Зашто само вака подготвени можеме со радост да го чекаме и денот на духот свети оти љубовта кога се споделува таа се премножува.

Архиепископот Охридски и Македонски г.г. Стефан посочи дека и нашата осумдесетгодишна заложба за самостојна Црква никогаш немала и нема за цел да нè оддели од Телото Христово, туку да ни дозволи и ние, подобно на другите православни народи, слободно да можеме да ја извршуваме својата мисија меѓу својот народ, овде, во татковината и насекаде по светот, до каде што нѐ има.

„Овој историски период кој сите ние го минуваме е празник за сите христијани во Македонија, без разлика на национално потекло, кои се внуци на оние што сонуваа да ја видат обновена својата Охридска Архиепископија, да ја видат автокефална, или се правнуци на сите оние кои некогаш живееле обединети под едниот омофор на Охридскиот Архиепископ. Тие наши предци сега се радуваат заедно со нас, гледајќи ги нашата радост и нашето единство“, порача г.г. Стефан упатувајќи благодарност до српскиот патријарх Порфириј и до целата СПЦ, во името на архиереите од МПЦ-ОА, од верниците и од граѓаните за денешниот историски настан кон води и кон официјално признавање на автокефалноста на Македонската православна црква – Охридска архиепископија.