Службите за имунизација во Здравствените домови да ги интензивираат активностите за проверка на евиденцијата и изнаоѓање невакцинирани или непотполно вакцинирани деца од морбили и тие да бидат вакцинирани, а посебно да се посвети внимание на исипните трески кај пациентите и доколку се посомневаат за морбили веднаш да пријават до надлежните служби.
Ова го препорача Комисијата за заразни болести при Министерството за здравство по денешната редовна работа средба, за да се спречи појава и ширење на морбилите во Република Македонијa, поради состојбата со епидемии на морбили во соседните држави, со појавата на смртни случаи, а имајќи ги во предвид честите меѓународни патувања и комуникација, како и нискиот опфат со вакцинација против морбили во државата.
Исто така се препорачува, лицата кои патуваат во земји каде има активни епидемии на мали сипаници – да го проверат својот вакцинален статус и тоа: за лицата од 12 месеци до 18 години во вакциналните служби, а за лицата на возраст од 19 до 45 години во Центрите за јавно здравје. Доколку овие лица се невакцинирани, некомплетно вакцинирани или немаат доказ за прележана болест соодветно ќе се вакцинираат.
Препорака, пак, до родителите е навремено да ги вакцинираат своите деца, пред се поради заштита на нивното здравје, како и заштита на здравјето на најблиските и на пошироката заедница.
Инаку, според статитиката на Комисијата, во Република Македонија, годинава се регистрирани девет случаи со морбили, од кои само четири се епидемиолошки поврзани.