Во Кривичниот суд почна судењето по поднесен обвинителен предлог од Обвинителството за гонење на организиран криминал и корупција од Одделот за гонење на полицајци кое ги товари за злоупотреба на службената положба.
Сите тројца работеле во ОВР Кочани на различни работни позиции, а се товарат за став од Кривичниот законик, за кој им се заканува затворска казна до три години, рекоа дека не се чувствуваат виновни за кривичните дела.
Тие всушност се товарат бидејќи кога правеле акциска контрола за присуство на малолетници, при изготвување на записниците за констатираните прекршоци, наместо за правното лице во чија сопственост било кабарето „Пулс“, „ММММ кафе“, пишувале прекршоци за „Класик“, кое имало блокирана сметка и за сопственикот Дејан Јованов Деко, кој не фигурирал како сопственик на „Пулс“.
Едниот од нив ги потврдил и без да ја провери документацијата ги поднел до кочанскиот суд, а судот во Кочани уште нема донесено одлука за нив.
– Во суштина проблемот е дека кога се врши акциска контрола и кога ќе констатирате прекршок по било кој член од Законот за прекршоци против јавниот ред и мир има начин, односно правила по кој се составува записникот. Тие правила им се точно наведени во анкес планот освен за акциска контрола затоа и обвинителството го предлага тој анекс план како доказ во оваа постапка. Во тој анекс план точно пишува што треба да земат полициските службеници од одговорното лице, од правното лице каде што е констатиран прекршокот и врз основа на правилната документација да ги наведат сите податоци за записниците за констатирани прекршоци. Во конкретниот случај таква материјална документација не е побарана, туку како им било побарано така си запишале, при што се запишани и правно лице коешто во моментот било неактивно и одговорно лице кое не било активно на клубот пулс односно тоа што е подружница на правното лице што стои во позадина.
Дејствијата на третиот обвинет коешто се повторува во двата настани, е тоа што кога се доставуваат барањата за прекршочна постапка мора тој како одговорно лице да ги потпише. Но, самите барања не се поднесуваат голи туку истите имаат пропратна материјална документација вклучувајќи за едниот настан и тековната во централниот регистер во земјава. Тоа значи дека истиот имал увид да види дали тоа правно лице било активно или неактивно и дали тоа било одговорно лице кое што е наведено во записниците или не. Иако ја имал во прилог, третиот обвинет ги потпишал барањата и се поднесени до судот, во судот се оформени предмети и постапката за истите се уште е во тек, не е донесена одлука – изјави обвинителката која го води случајот Ивана Алексова Трајчева.
Обвинителката го прочита обвинителниот предлог, а одбраната на полицајците за следното рочиште најави сведоци. Полицајците Кире Богатинов кој бил водич на безбедносен реон вршел една акциска контрола, другиот полицаец Горан Лазарв кој бил сменоводител вршел друга акциска контрола, а Александар Темелков кој бил помошник за јавен ред и мир ги предавал барањата за прекршоци до Судот во Кочани. Детето на еден од обвинетите полицајци, било повредено во трагедијата.
Ова е прво рочиште за полицајци обвинети за поврзаност со трагедијата. Овие тројца и уште деветмина се товарат за злоупотреба на службената положба, а 13 се обвинети за директна инволвираност во трагедијата. За нив сè уште не е оценето обвинението. Во катастрофалниот пожар во кабарето „Пулс“ загинаа 63 млади луѓе, а преку 200 беа повредени.
Фото: Слободен печат.мк