Голем дел од политичарите и медиумите во соседна Албанија вчера избрзаа со честитки за нова влада меѓу старите коалициски партнери Груевски и Ахмети, јавува телевизија Алсат.
Наседна и опозициската Демократската партија на Албанија која официјално преку соопштение го поздрави формирањето на новата влада во Скопје меѓу ВМРО-ДПМНЕ и ДУИ.
„Демократската партија ù посакува успех на новата влада во Македонија и ветува дека кога ќе управува со државата ќе биде сериозен партнер за реализација на големиот проект за евроатланска интеграција на регионот како безбеден пат на зајакнување на мирот и стабилноста.“ – соопштија од Демократска партија на Албанија
Оваа избрзана реакција, пишува Алсат, како да покажа дека опозицијата во соседна Албанија посакува коалиција меѓу ВМРО и ДУИ. Сето ова се случи во време кога претседателството на ДУИ расправаше во Мала Речица, а во фокусот беше улогата на Груевски во текот на овие години во однос на Албанците кои, според дел од дебатите, за малку Албанците ги довело до работ на граѓанска војна со настаните во Куманово.
На дезинформациите во медиумите во Тирана наседнаа и други големи политички имиња во Албанија како Пандели Мајко и Тритан Шеху кои на нивните профили на социјалните мрежи го поздравија непостоечки договор за влада.