Македонија е на дното од земјите кои немаат лекови за болните од леукемија и зад најсиромашните земји во Африка, тврдат од меѓународната асоцијација која се грижи за едукација на овие пациенти. Драган Смугрески, 57-годишен, кој боледува од хронична миелоична леукемија останал без двете нозе бидејќи државата не му обезбедила лек од втора линија за оваа болест. Со солзи во очите зборува како заради ова му се влошила здравствената состојба поради што му биле ампутирани двете нозе.
„Примам цитостатик, застарен лек поради што се зголемија тромбоцитите и минатата година ми беа ампутирани двете нозе поради гангрена“, изјави Драган Смугрески, пациент со ХМЛ.
Тој е еден од 40 пациенти на кој не им делува лекот кој се наоѓа на позитивната листа и чекаат државата да им обезбеди лек од втора, а некои од нив и од трета линија. Пред три месеци, откако НОВА обелодени дека пациенти умираат чекајќи на неопходниот лек, министерот за здравство Таравари вети дека 20 од нив ќе ја добијат потребната терапија. Останатите 20 тешко болни кои не се најдоа во изборот, се оставени на милост и немилост без потребната терапија. Но, процедурата за набавка на лековите заглави во Агенцијата за лекови, се до вчера кога поради медиумскиот притисок е отстранета грешката.
„Седнавме се договоривме и отстранета е пречката со документот за технички дијалог кој претходи на процедурата на секоја јавна набавка, така што тендерот ќе биде распишан и што е најважно локалните избори нема да бидат пречка да се реализира набавката“, изјави Пепо Леви, претседател на Здружението на пациенти со ХМЛ.
И од Агенцијата за лекови потврдија дека се усогласиле и се обезбедени финансиски средства за лекување 20 пациенти.
„Преходната директорка не ме извести за оваа одлука, но веднаш откако реагиравте како медиум му се јавив на Пепо Леви и ја надминавме пречката“, изјави Роберт Бекироски директор на Агенцијата за лекови.
Од меѓународната асоцијација CML „Advocates Network“ (Мрежа на адвокати) од Швајцарија го прашаа директорот на Агенцијата за лекови зошто во Македонија се уште се умира од оваа болест, на што тој одговори дека како ново назначен ќе се труди да обезбеди лекови.
„Македонија е на дното, последна земја за која нема лекови од втора, трета, петта линија во лекувањето како што ги има секаде во свет. Тука сме да помогнеме да не ни умираат луѓе“, изјави Лидија Пецова, по потекло од Македонија која работи во CML „ Advocates Network“(Мрежа на адвокати) од Швајцарија.
За дел од пациентите на кои не им делува ниту лекот од втората линија, ништо ниту е ветено, ниту е договорено.Овие луѓе заедно со останатите за кои нема да биде обезбеден лекот се осудени да тивко да умираат бидејќи месечната терапија чини 3 500 евра, а тие не можат да ја купат.