Со интерактивна уметничка инсталација – изложба на платото пред Владата и внатре во зградата, попладнево започнува централната прослава за Денот на независноста на Македонија.
Во текот на денот ќе се одржи детската театарска претстава “Маша и нејзината приказна” – работена по популарната серија “Бајките на Маша” од интерактивен карактер, која како што најавија од владината прес служба, изобилува со музички делови, оригинални костими, а секако присутни се и едукативни моменти.
Граѓаните кои ќе присуствуваат на настаните ќе имаат можност да ги гледаат Dancers United, танцово студио за инклузивни настапи на танчери со Даунов Синдром и танчери со типичен развој.
Во 19 часот пред Влада, започнуваат со настап Гудачки квартет ВИВА Стринг, а по нив настапува Хорот при Македонската опера и балет со неколку кратки композиции од Прокопиев, како и изведба на химната на Република Македонија.
Во 19.30 часот е предвидено обраќање на премиерот Зоран Заев.
Од 20 часот, ќе настапат и повеќе музички изведувачи: Биг бенд на Здружението на џез музичарите на Македонија, Љубојна со специјалниот гостин Џамбо Агушев, Бени и Нон-стоп со специјален гостин Златко Ориѓански, Влатко Стефановски Трио, К’пурдат од Тетово, Шутка Рома Рап и хип хоп артистот Слаткар.
Од Владата потсетуваат дека сите активности се од отворен карактер, и ги покануваат граѓаните да се приклучат во заедничката прослава на Денот на независноста на Република Македонија.
Утре на 8 септември, Ден на независноста се одбележува и со положување свежо цвеќе на вечните почивалишта на претседателите Киро Глигоров и Борис Трајковски и пред споменикот „Ослободители на Скопје“ пред Владата, од страна на делегации на Влада на Република Македонија, предводени од премиерот Зоран Заев.