Новата Влада направила многу во поглед на транспарентноста и отченоста пред граѓаните и медиумите во првите 100 дена од управувањето со државата, смета министерот без ресор, задолжен за комуникации, транспарентност и отчетност, Роберт Поповски на првата прес-конференција по промената на власта.
Придонесот кон тоа го дале, како што одговори на прашање на НОВА, министерот Поповски, 33 службеници во власта кои се под негова надлежност.
Набројувајќи ги мерките кои оваа Влада ги донела, министерот Поповски посочи на одлуката за забрана на користење државни ресурси за време на изборната кампања, како и можноста за бесплатен пристап до информации од Централниот регистар и Катастарот.
Дел од мерките кои Поповски ги истакна се и редовното објавување на дневниот ред за седници на Влада, како и брифинзите со медиумите по седниците, за што кажа дека досега претходната Влада не го практикувала тоа.
На прашање на НОВА, зошто досега тој не излегол во јавноста да објасни за ангажирањето на индивидуалци за чии имиња имаше поширока дебата пред се на социјалните мрежи, Поповски рече дека се работело за исклучителни и докажани професионалци.
„Се работи за исклучителни професионалци во полето на кое работат. Но она што особено ми е драго е што пред овие 100 дена, дебата воопшто немаше. Сега амбиентот е сменет и здраво е и сакаме да има дебата за секој ангажман кој Владата го прави, бидејќи претходно тоа не беше можно“, изјави Поповски.