„Стоп за рудници“, „Стоп за рудникот на смртта“ порачаа младите на денешниот протестен марш низ општина Босилово како одговор на намерата за отворање на рудникот „Иловица-Штука“ на компанијата „Еуромакс Рисорсис“ на планината Огражден. Под мотото „Глас за чиста животна средина, глас за здрава иднина, глас против рудниците на смртта“ ги повикаа политичарите да донесат одлука што ја ветиле и во интерес е на граѓаните.
„Јавно ги повикуваме како централните, така и локалните власти да го решат проблемот. Упатуваме пораки, прес се, од млади луѓе кои се револтирани од негрижата на властите за нашата иднина и јавно бараме еднасш засекогаш да го решат ова прашање. Велиме „не за рудници“ бидејќи младите се тие кои ќе трпат последици од нивното отворање“, рече Мики Крстев, жител на село Штука.
Од импровизираната бина на камион се присутните се обратија и други млади лица од двете села (Иловица и Штука), а говореше и Ангел Наков од организацијата „Спас за Гевгелија“. И тој побара од Владата да не дозволи отворање на рудник и нагласи дека мисија на премиерот е да каже не за проектот.
На протестниот марш се појавија и градоначалникот на Босилово, Зоран Зимбаков, потоа в.д. градоначалникот на Ново Село, Горан Цветков и пратеничката од ДОМ, Лилјана Поповска.