Словенечкиот премиер Роберт Голоб на прес-конференцијата со македонскиот колега Димитар Ковачевски рече дека очекува кај сите политички партии во Македонија „да преовлада разумот и до ноември да бидат изгласани уставните измени“.
Голоб, кој денеска во Љубљана беше домаќин на шефот на македонската Влада Ковачевски и неговата делегација, нагласи дека процесот на преговори со ЕУ не смее да престане и дека не треба да се поставуваат дополнителни услови на Македонија.
„Северна Македонија е дел од Европа, секогаш била и сега е време да стане дел од европското семејство. Предолго се чекаше на тоа и денес овој процес конечно се мрдна од место и треба сите да направиме сè што можеме никогаш повеќе да не застане. Јас знам дека уставните измени се тешка задача, но верувам дека ќе преовлада разумот кај сите политички субјекти. Сегашниот процес на преговори не смее да застане. Ќе инсистираме да одите понатаму и освен промената на Уставот, да не се бараат и поставуваат други услови“, порача Голоб на заедничката прес-конференција со премиерот Ковачевски.
Ковачевски од своја страна рече дека земјава секогаш кога носела големи одлуки „излегувала посилна“.
„Пред нас е носење уставни измени коишто се дел од условите во преговарачката рамка. И нив кога ќе го донесеме државата пак ќе излезе и посилна и како победник затоа што после тоа автоматски продолжува втората меѓувладина конференција, отворање на кластерите, реформите во општеството и полноправно зачленување во ЕУ, за што поддршка имаме од сите земји членки“, порача Ковачевски.
Р.Н.