Поранешен руски шпион се наоѓа во критична состојба откако дошол во контакт со „непозната супстанца“ во Салсбери, јавија британските медиуми, наведувајќи дека се работи за Сергеј Скрипал кој во 2006 година беше осуден на 13 години затвор за шпионажа за британската агенција МИ6.
Британската полиција соопшти дека две лица, 66 годишен маж, идентификуван од два извора блиски до истрагата како Сергеј Скрипал и 33 годишна жена, биле пронајдени во несвесна состојба на клупа во трговски центар во Салсбери, јужна Англија.
Тие наводно биле изложени на непозната супстанца. И двајцата биле во критична состојба и се наоѓале во интензивна нега.
Помошник шефот на полицијата во Вилтшир Крејг Холден наведе дека се отворени сите опции во врска со случајот. Полицијата затвори еден ресторан во Сaлсбери во врска со инцидентот, објавија некои британски медиуми. Се уште не е јасно каква е врската.
Скрипал, кој некогаш беше полковник во руската воена разузнавачка служба ГРУ, беше осуден за предавство на Русија во 2006 година, но беше разменет како дел од размената на шпиони во стилот на Студената војна во 2010 година на аеродромот во Виена.
Односите меѓу Британија и Русија се затегнати по убиството на поранешниот агент на КГБ, Александар Литвиненко, со радиоактивен полониум-210 во Лондон во 2006 година.
За ова убиство британската истрага смета дека веројатно било одобрено од претседателот Владимир Путин. Кремљ постојано негира каква било вмешаност во убиството.