Поранешниот директор на Агенцијата за национална безбедност, Виктор Димовски, реагираше на сериозните обвинувања изнесени од премиерот и актуелниот директор на АНБ за наводна злоупотреба на државни ресурси за прислушкување на поранешниот лидер на опозицијата, сега премиер, како и на бизнисмени и новинари.
Во соопштение до јавноста, поранешниот директор посочи дека на претходен медиумски брифинг во АНБ бил споменат периодот од 2019 до 2024 година, за време на кој и тој ја извршувал функцијата. Тој изјави дека, во периодот од 2019 до 2022 година, тогашниот лидер на опозициската партија не бил предмет на „посебен оперативен интерес“ на Агенцијата, ниту пак бил цел на „организирана оперативна работа“, што, според него, значи дека не биле применувани никакви оперативно-технички мерки против него.
Тој потврди дека во тој период, согласно законските надлежности, АНБ спровела постапка за преиспитување на безбедносни сертификати, вклучително и за еден тогашен и сегашен пратеник поради оддавање класифицирани информации. За случајот, рече дека била поднесена соодветна кривична пријава до надлежното обвинителство.
Повикувајќи се на сериозноста на обвинувањата, тој апелираше до актуелниот директор на АНБ итно да ги декласифицира документите што се однесуваат на наводните злоупотреби, посебно оние поврзани со прислушкување на тогашниот лидер на опозицијата.
„Македонската јавност има право да знае кој тоа предлагал, барал, одобрувал и кој ги извршувал наводните прислушкувања“, наведува поранешниот директор, додавајќи дека очекува документите да не останат скриени зад ознаката „државна тајна“, особено по неколкуте медиумски објави во кои се споменуваат конкретни имиња на наводни цели на АНБ, како и податоци за идентитетот на вработени и тајни соработници.