Јужноафриканка на свет донесе 10 бебиња што би можело да претставува нов светски рекорд, јави денеска „Би-Би-Си“. Сопругот на Госиаме Тамара Ситоле рече дека ги изненадиле две бебиња, бидејќи на ултразвук претходно виделе осум.

– Седум се момчиња и три девојчиња. Среќен сум. Емотивен сум. Не можам многу да зборувам, рече Тебохо Цотетси за „Преторија њуз“.

Јужноафриканско официјално лице ја потврди информацијата на „Би-Би-Си“, но друг порача дека допрва треба да се видат бебињата. Случајот го истражуваат и претставници на Гинисовата книга на рекорди.

Гинисовиот рекорд на најмногу родени бебиња во еден пород моментно го држи жена која роди осумка во САД во 2009 година. Минатиот месец, 25-годишната Халима Сисе од Мали роди девет бебиња кои добро напредуваат во клиника во Мароко.

Породувања со повеќе од три бебиња се реткост и во најголем дел се резултат на третман на плодност, но двојката од Јужна Африка тврди дека нивните бебиња се зачнати по природен пат.