Украинскиот претседател Петро Порошенко ја тужи британската телевизиска мрежа „Би-Би-Си“ за клевета поради написот во кој се тврди дека Киев платил за средба со американскиот претседател Доналд Трамп.
Во написот објавен во мај, „Би-Би-Си“ наведува дека поранешниот адвокат на Трамп, Мајкл Коен добил меѓу 400.000 и 600.000 долари од украинскиот претседател за организација на првата средба меѓу Порошенко и Трамп во Белата куќа во јуни 2017 година.
Според тој напис, кој се повикува на неименувани украински извори, цел на состанокот било зголемување на влијанието на Киев во Вашингтон, на тој начин што состанокот би изгледал како „вистински разговор“ наместо на куса средба.
Порошенко во тужбата наведува дека текстот е исклучително штетен не само за неговата функција како претседател на држава туку и за неговата репутација како политичар и претприемач.
Тој бара демант од британската телевизија за тврдењата и отштета за клевета.