Во Португалија денеска се одржуваат парламентарни избори на кои се очекува да победи Социјалистичката партија и да обезбеди власт и во наредните четири години. Земјата, во мандатот на премиерот Антонио Кошта, забележа силно економско закрепнување со раст од 0,2 проценти во 2014 година до 2,1 процент во 2018 година, додека невработеноста падна за околу половина, на шест проценти.
Во Португалија, партијата што ќе освои најмногу од 230 места во парламентот дава мандатар кој составува влада и ја води земјата во четиригодишен мандат. Функцијата на претседателот воглавно е протоколарна.
Според најновите анкети, Социјалистичката партија ќе добие нешто помалку од апсолутно мнозинство во парламентот, што значи дека ќе мора да преговара со другите левичарски партии, како што направи по минатите избори со Комунистичката партија и радикалниот Лев блок.
Право на глас имаат околу 10,8 милиони граѓани, од кои многу се Португалци кои живеат во странство.