Поштенска марка по повод историскиот настап на македонските фудбалери на Европско првенство во фудбал 2020 промовираше денеска АД Пошта на Северна Македонија.
Но на настанот не присуствуваа ни потпретседателот на Фудбалската федерација на Македонија (ФФМ), Лазар Ракиџиев, ниту селекторот Игор Ангеловски-Мрме.
– За жал, потпретседателот на Фудбалската федерација не смогна сили да дојде и покрај поканата на овој настан кој е настан на целата држава, непотребно фрлен во сенка на еден искрен и чесен пристап на вработените на АД ‘Пошта на Северна Македонија’“, изјави генералниот директор на АД „Пошта на Северна Македонија“ – Скопје, Јани Макрадули.
На промоцијата, која се одржа во просториите на Дирекцијата на „Пошта“, Макрадули порача дека со оваа поштенска марка сакаат да им се заблагодарат на репрезентативците за успехот и радоста што ја приредија на сите нас.
– Марката е со номинална вредност од 181 денар и изработена е во 6. 000 примероци. Поради ковид-мерките, иако бевме договорени, денеска, за жал со нас не се селекторот и играчите, изјави Макрадули.
Ова е скромен придонес од нас за сите фудбалски репрезентативци, посочи Макрадули и им посака успех на првенството.
Директорот на Агенцијата за млади и спорт, Наумче Мојсоски, порача дека нашите фудбалски херои го заслужуваат ваквиот гест и поштенска марка во нивна чест.
– Се надевам дека до почетокот на отворањето на ЕП ќе собереме сили што повеќе граѓани да присуствуваат на трибините во Букурешт. Како спортист знам дека не е исто, да се игра со полни и пред празни трибини, изјави Мојсоски.
Mакедонската фудбалска репрезентација обезбеди прв историски настап на ЕУРО2020, што од 11 јуни до 11 јули ќе се одржи во повеќе градови низ Европа.
Македонските фудбалери својот прв натпревар на Европското првенство го играат на 13 јуни во Букурешт против Австрија, потоа се пресметките со Украина и Холандија.