Кан, филмскиот свет, но и целата планета, која ја носи во срцето „седмата уметност“, синоќа нетрпеливо го чекаа качувањето по црвениот тепих на легендата Харисон Форд (80), пред светската премиера на петтата сага за познатиот археолог во филмот без конкуренција „Индијана Џонс и артефактот на судбината“.
„На секоја слика сум јас, но помлад. Имаат библиотека со мои снимки. Благодарение на вештачката интелигенција, тие можеа да изберат совршена слика или поглед при снимањето на најновиот филм. Но, сцените јас ги играв. Тоа беше извонреден начин на снимање. Презадоволен сум од резултатот, кој го сметам за многу автентичен“, изјави Форд.
Познатиот американски актер веќе се изјасни дека повеќе нема да го снима Индијана Џонс.
„Дури кога завршивме со снимањето сфатив дека ова е мојот последен Индијана Џонс. Беше вистинско задоволство. Не само затоа што беше последен, туку и затоа што сценариото беше добро, со одличен кастинг. Беше многу работа, но задоволен сум што успеав повторно да го доловам тој лик“, заклучи тој пред светската премиера.
Дејствието на филмот се случува кон крајот на шеесеттите, за време на Студената војна. Индијана Џонс тргнува во потрага по објект што може да го промени текот на историјата, загрижен дека американската влада регрутирала поранешни нацисти со цел да го порази Советскиот Сојуз во освојувањето на вселената.
Заедно со Харисон Форд, во филмот играат Фиби Волер Бриџ, Мадс Микелсен, Џон Рис Дејвис, Антонио Бандерас… Снимањето започна во јуни 2021 година, се одвиваше на различни локации во Велика Британија, Италија и Мароко, а заврши во февруари 2022 година. Продуцентите се „Walt Disney Pictures“ и „Lucas Film“, а дистрибутер е „Disney Studio Motion Pictures“. Со проценет буџет од близу 300 милиони долари, тој е еден од најскапите филмови некогаш снимени.
Првиот филм од оваа серија е снимен во 1981 година, а ликот на Индијана Џонс го создадоа Стивен Спилберг и Џорџ Лукас. Новите епизоди се снимени во 1984, 1989 и 2008 година. „Индијана Џонс и артефактот на судбината“ е првиот филм од серијата што не е режиран од Стивен Спилберг, а не е напишан од Џорџ Лукас, кои овојпат се извршни продуценти. Во Америка ќе се прикажува за неколку дена, на 30 мај.
Инаку, проекцијата на новиот филм на познатиот шпански режисер Педро Алмодовар (73) предизвика големо внимание во средата во Кан. Станува збор за филм со средна должина (31 минута) на англиски јазик прикажан вон конкуренција под наслов „Strange Way of Life“ со заплет кој се одвива околу хомосексуален каубој.