Судењето за случајот Поткуп е одложено поради отсуство на судијката. Премиерот Зоран Заев, како обвинет во овој случај, се појави во судница, но беше известен дека судијката Јана Груевска Илиевска е на боледување и судењето се одложува за 20 ноември.
Судот воедно го одби барањето на одбраната снимките кои се доказ во постапката, а кои беа објавени на Јутјуб да не се користат во предметот.
Решението дека овие снимки ќе бидат доказ во постапката им беше врачено на обвинетиот Заев и на неговите адвокати. Адвокатот Филип Медарски најави жалба на ова решение.
Заев изјави дека тој и неговата одбрана размислувале дали да ја објават целосната снимка од разговорот со бизнисменот за да се дознае целата содржина или да бараат нејзино изземање како доказ, по што одлучиле да ја искористат втората можност. Обвинителството треба да утврди и како снимката завршила на интернет.
„Би го објавил целосно (снимениот материјал) за да се дознае вистината за мене. Значи, само ако се слушне целата снимка, веднаш ќе се знае дека тоа е монтирано и направено толку грдо да изгледа. Ако целосната снимка не го реши судскиот процес, барем ќе го обели мојот образ“, изјави Заев.
Тој потенцираше дека снимките кои беа објавени на ЈуТјуб се резултат на незаконско следење.
„Тоа се мерки од незаконско следење и верувам дека ваквите мерки навистина треба да не се користат во постапката…тука сме на сите рочишта и до крај ќе опстоиме за да ја добиеме правдата“, изјави Премиерот.
Заев е обвинет дека како градоначалник на Струмица побарал поткуп од струмичкиот бизнисмен Иван Николов Сачевалиев, во вредност од 160 илјади евра за градежно земјиште во Струмица