Во Меморијалниот центар во Поточари, одбележувањето на 30-годишнината од страдањето на Бошњаците од Сребреница за време на граѓанската војна, во јули 1995 година, започна со пеење на националната химна на Босна и Херцеговина.
На одбележувањето му претходеа вообичаените манифестации како што се „Маршот на мирот“, пуштањето јато гулаби, погребните служби за жртвите, а денес ќе бидат погребани останките на уште седум лица.
На одбележувањето присуствуваат претседателот на Европскиот совет, Антонио Кошта, делегации од земјите од регионот, Хрватска, Словенија и Црна Гора, претставници на меѓународната заедница и дипломатскиот кор.
Комеморативниот собир во Поточари го обезбедува Полицијата на Република Српска со поддршка на други безбедносни структури во Босна и Херцеговина.
За безбедноста на сите учесници, употребата на беспилотни летала е забранета. За разлика од претходните години, на новинарите од Република Српска не им беше дозволено да бидат акредитирани за да го следат овој настан.
На предлог на Германија и Руанда, во мај минатата година, Генералното собрание на ООН усвои резолуција со која го прогласи 11-ти јули за Меѓународен ден на сеќавање на геноцидот во Сребреница.