Лидерот на партијата „Има таков народ“, Слави Трифонов денеска најави дека ја напушта владата на премиерот Кирил Петков поради неговите обиди да постигне компромис со Северна Македонија и поради тоа што „државата нема пари“.
„Причините поради кои оваа коалиција не функционира и за нас нема место во неа се две: Македонија и фактот дека државата веќе нема пари“, соопшти Трифунов на вонредно обраќање.
Тој го обвини Петков дека во однос на спорот со Северна Македонија води друга надворешна политика, различна од таа на парламентот, Министерството за надворешни работи и од политиката декларирана од Консултативниот совет на претседателот Румен Радев.
Кирил Петков предводи влада составена од четири партии во која, покрај Има таков народ, е и неговата Промената продолжува, Демократска Бугарија и Бугарската социјалистичка партија.
Трифонов го обвинува за заткулисни игри. „Премиерот си има друг министер за надворешни работи, не министерката Теодора Генчовска, туку друг, која се вика Весела Чернева. Кирил Петков им ветил на различни лидери од Европа и светот дека ќе го подигне ветото за Северна Македонија, и покрај тоа што огромен дел од бугарските граѓани сакаат Северна Македонија да започне преговори дури откако ќе го исполни договорот меѓу двете држави потпишан во 2017 година. На тој начин Кирил Петков грубо, без пардон и еднострано го нарушува потпишаниот коалициски договор. Тоа се нарекува национално предавство“, рече Трифонов.
Во првичната реакција по објавата на Трифонов, премиерот Петков најави дека тој и понатаму ќе предводи „малцинска влада“. Според информациите во бугарските медиуми, тројца министри на Има таков народ ја напуштиле денешната владина седница, додека четвртиот воопшто не присуствувал.