Командант на единицата на украинските маринци во опколениот град Мариупол напиша писмо до папата Франциско во кое апелира тој да ги спаси луѓето што останале во градот кој е под опсада и под силно бомбардирање.
Во писмото, објавено на веб-страницата „Украинска правда“, мајор Серхи Волина, командант на 36-та одделна поморска бригада, напиша: „Не ги видов вашите апели до светот и не ги прочитав сите ваши последни изјави, се борев повеќе од 50 дена во целосно опкружување бидејќи единствено за што имам време е жестока битка за секој метар од градот опколен од непријателот“.
Волина рече дека е подготвен „да се бори до крај“, и покрај постојаниот артилериски и ракетен оган, недостатокот на вода, храна и лекови, додавајќи: „Веројатно сте виделе многу во вашиот живот. Но, сигурен сум дека никогаш не сте виделе што се случува во Мариупол. Затоа што така изгледа пеколот на Земјата. Имам малку време да ги опишам сите ужаси што ги гледам овде секој ден. Во фабриката (Азовстал), жени со деца и бебиња живеат во бункери. Во глад и студ секој ден се мета на непријателската авијација. Ранетите умираат секој ден затоа што нема лекови, нема вода, нема храна“.
„Дојде време кога молитвата не е доволна“, рече Волина. „Помогнете да се спасат. По бомбардирањето на драмскиот театар, никој не им верува на руските окупатори. Донесете ја вистината на светот, евакуирајте ги луѓето и спасете ги нивните животи од рацете на сатаната, кој сака да ги запали сите живи суштества“.