Ветерот и сувата вегетација помогнаа попладнево повторно да се активира шумскиот пожар на падините на Осоговските Планини над Кочани, што рано изутрината беше ставен под контрола. Огнената стихија брзо се шири и стигна до Фабриката за вода за пиење и до куќите во нејзина близина и ја загрозува безбедноста на неколку населби во североисточниот дел на градот.
Пожарот е под контрола, нема опасност за домовите, но не е локализиран, вели директорот на Центарот за управување со кризи Стојанче Ангелов. Во гаснењето се прклучени околу 400 луѓе, а покрај пожарникарите од Кочани, Виница, Штип и Македонска Каменица, помагаат и луѓе вработени во локалните самоуправи обучени за интервенции во вакви ситуации. Во гаснењето се вклучени и два хеликоптери на АРМ.
Од Територијалната противпожарна единица во Кочани информираа дека проблем е што огнот е раширен на околу десетина километри. Интервенцијата е отежната и поради стрмниот терен до кој не може да се пристапи со противпожарните возила.
Општината Кочани апелираше до граѓаните за воздржување од зголемена и непотребна потрошувачка на водата за пиење.
– Дел од препумпните станици и Фабриката за вода се наоѓаат во зоната на пожарот, па како превентивна мерка е исклучена електричната енергија и пумпите подолг период не работат, поради што може да дојде до прекин во водоснабдувањето. Рационалното користење на водата од Градскиот водовод е неопходно и заради полнењето на противпожарните возила кои интеревенираат во гаснењето на огнот, информираа од Општина Кочани.