На функционерите на ЕУ им е кажано да не одржуваат состаноци со колеги од Обединетото Кралство, освен ако тие не се строго поврзани со војната во Украина или не се „правно обрзувачки“. Овој чекор е протолкуван како најнова индикација за замрзнување на односите меѓу Брисел и Лондон.
Во белешка доставени до високи претставници на Европската комисија, во која имаше увид порталот EURACTIV, генералниот секретар на Комисијата Илзе Јухансон бара од „сите генерални директорати и служби да го информираат Генералниот секретаријат за какви било барања за билатерални состаноци од официјални претставници на Обединетото Кралство, без оглед на нивото од кое доаѓаат“.
Состаноците треба да се одржуваат само ако се „правно обврзувачки“, се однесуваат на спроведувањето на Договорот за излегување на Обединетото Кралство од ЕУ или се однесуваат стриктно на војната во Украина.
„Одбивањето на барањето за средба треба да се објасни со неодамнешните случувања во односите меѓу ЕУ и Обединетото Кралство“, додаде првиот државен службеник на Комисијата.
Брисел и Лондон се расправаат околу голем број прашања откако новиот Договор за трговија и соработка со кој се регулираат односите меѓу ЕУ и Обединетото Кралство во 2021 година стапи на сила, вклучувајќи го протоколот за Северна Ирска и пристапот на Обединетото Кралство до истражувачката програма Хоризонт Европа, при што двете страни започнаа прекршочна постапка против другиот.
Сепак, на состанокот на Парламентарното партнерство на Обединетото Кралство и ЕУ (ППА) во Лондон претходно оваа недела, потпретседателот на Европската комисија Марош Шефчовиќ рече дека не верува дека ЕУ и Обединетото Кралство се многу далеку од решавање на разликите околу спроведувањето на протоколот.
„Доколку постои политичка волја, сигурен сум дека можеме да го решиме тоа во рок од неколку недели, бидејќи нашите преговарачки тимови ги знаат овие теми од сите агли“, рече тој.
Коминикето, исто така, се однесува на владиниот нацрт-закон кој моментално поминува низ парламентот на Обединетото Кралство, кој ќе им даде на министрите овластување да го отфрлат Протоколот за Северна Ирска, „што доколку се усвои ќе биде јасно прекршување на Договорот за излегување од ЕУ и досега невидено прекршување на меѓународните обврски и доверба“, изјави Јухансон.
Извор: Еуроактив