Се уште не се знае причината за пожарот кој избувнал изутрината пред 5 часот во домот на семејството Зулбеари, во кој настрадаа Фатиме Зулбеари (39) и нејзините четири деца на возраст од 6, 9, 12 и 14 години во тетовската населба Певчина. Постојат сомнежи дека настанал или од печката на дрва на која што се затоплувале или пак од неисправна инсталација.
Пожарот избил на вториот кат од куќата, каде спиеле мајката и нејзините четири деца. Како што пишуваат медиумите, нивниот татко вечерта не бил дома, затоа што работел ноќна смена како чувар.
Во куќата биле свекорот и свекрвата, 66-годишната баба и 77-годишниот дедо на семејството Зулбеари, кои спиеле во приземјето на куќата во моментот напожарот. Тие успеале да излезат неповредени навреме од куќата.
– Во 3 часот и 30 минути почувствувавме дека има пожар, имаше чад. Мислев дека и мојата куќа е зафатена, ама за среќа немаме последици. Комшијата Муса е чувар, бил на работа, а како што разбрав, жена му Фатиме и децата спиеле на горниот кат. Долу во приземјето, спиеја Суљо таткото на Муса и мајката, свекорот и свекрвата на Фатиме. Тие се по потекло од селото Церово, ја купија куќата пред десетина години. До 7.30 се гаснеше пожарот, изјави соседот Мусли Мемеди.
При гаснењето на пожарот интервенирале 13 пожарникари, со четири возила за да го гаснат пожарот кој зафатил три куќи.
– Изгорената покривна конструкција беше падната над тела кои ги видовме, над жртвите за кои не знам колку се и како се починати. На самото место се увиде дека има три куќи зафатени од пожар. Во средина е куќата со жртвите, целосна зафатена од пламени јазици. Се обидовме да го спречиме пожарот зашто се ширеше и нагоре и надоле. Куќите се „залепени“ една до друга. Оваа што изгоре беше стара куќа со стар материјал што лесно гори. Ако се проширеше, ќе беше уште поголема катастрофа. Имавме проблем за движење по тесните улици, изјави Ука Алити, командир на тетовската противпожарна единица.
Соседите раскажуваат дека ова е уште една трагедија во земејството Зулбеари. Пред пет години во сообраќајна на автопатот Тетово-Скопје загинало уште едно нивно дете тогаш на возраст од пет години.