Започна продолжението на конститутивната седница на која денеска треба да се избере претседател на Комисијата за избори и именувања и нејзини членови.
Претходно, на координативна средба, партиите договорија оваа комисија да брои 13 члена во однос 6 ВМРО-ДПМНЕ, 5 СДСМ, 1 ДУИ и 1 Беса.
Подоцна во текот на седницата треба да се избере и претседател на Собранието.
Прв за збор се јави Антонио Милошоски кој пред своите колеги истакна дека претседателот треба да биде од редовите на ВМРО-ДПМНЕ која победила на изборите, а Собранието не смеело да го води личност која ја нема осудено Платформата на Албанците.
Во галеријата на седницата присуствуваат дел од дипломатскиот кор, а забележливо е што првиот човек на ВМРО-ДПМНЕ, Никола Груевски не присуствува.
Новинарските екипи, седницата ја следат од прес-центарот, затоа што во галеријата е сместен дипломатскиот кор.