Десетина пратеници од различни партии предложија предлог за именување и дополнување на Законот за минерални суровини, кој доцна попладнево е ставен на дневен ред на денешната собраниска седница.
-Предложениот закон за минерални суровини содржи експлицитна забрана за експлоатација и преработка на минерални суровини со примена на цијаниди, сулфурна киселина и други опасни супстанци. Го предлагаме овој предлог за измени на законот за минерални суровини по скратена постапка, затоа што се работи за измени на се на се само 6 члена од овој закон, образложи Лилјана Поповска, пратеник на ДОМ, која е еден од предлагачите.
Во исто време Македонската асоцијација за рударство (МАР) на прес конференција обвини дека со ова практично ќе се затворат трите рудници за олово и цинк, Саса, Злетово и Тораница. Со измените се бара да не се користи цијанид во технолошкиот процес, што според претставниците на рударскиот сектор е вообичаена и дозволена постапка и во земјите од Европската Унија. Според рударската асоцијација со него неселективно се забранува користењето опасни супстанци, меѓу кои и на цијанидни соединенија и покрај тоа што рудниците имаат „А“ и „Б“ интегрирани еколошки дозволи.
–Со примената само на овие два члена ќе дојде до потполно затворање на рудниците во Македонија од една страна, но бидејќи рудниците не работат сами за себе и не само рудниците користат опасни супстанци, условно кажано, тоа значи дека ние треба да ја затвориме целокупната индустрија во Македонија, изјави Николајчо Николов, претседател на Македонска асоцијација за рударство
–Во 2010 година Европската комисија излегла со став дека треба да се употребуваат цијаниди во контролираните технолошки процеси и со сите мерки за претпазливост коишто се познати и коишто докажале дека во нормална примена не дозволуваат загрозување на животната средина, рече Максим Прохоров, од рудникот „Саса“.
Тие бараат од Собранието и од Владата да организираат широка јавна расправа, со учество на научната јавност, на која би бил разгледан предлогот.