Собранискиот спикер Талат Џафери денеска ја прекина работата на 79-тата седница, со образложение дека нема услови да се одлучува за прашањата, бидејќи во салата присуствуваа само 53 пратеници, од потпишани 85. Џафери ги повика претседателите на пратеничките групи од парламентарното мнозинство во 13 часот да се состанат кај него и да се договорат како ќе продолжат со работа.
„Поради фактот дека пратениците се потпишаа и одлучија да не влезат во салата, Собранието нема услови да може да одлучува за прашањата за кои треба да одлучува. Ова јасно ни кажува за пратениците и за ставот кој го имаат. Некои мислат дека ова е нивен имот и со нивниот имот можат да се однесуваат како сакаат, но ова не е наш имот како пратеници“, рече спикерот Џафери.
Според него би било коректно тие кои не сакаат да доаѓаат во Собранието и да бидат дел од работата на оваа институција, до него да поднесат барање за седница за распуштање на Собранието.
„Доколку тие не предложат, јас ќе предложам седница за распуштање на Собранието да се знае која е главната цел за нас, 120 пратеници. Во овие моменти Собранието треба да биде функционира без разлика дали му се допаѓа на некој тоа или не. Ова е демократија, а уцените не се дел од демократијата. Јас друг излез немам освен да ја прекинам седницата, а ако некој мисли дека седница ќе биде закажана со уцени и ултиматуми е грешка. Кој не сака да биде дел од мнозинството треба да каже дека од денеска не е мнозинство и нека прави мнозинство со кого сака“, рече Џафери, потенцирајќи дека „ова не може да се толерира“. (Р.Н.)