Рашела Мизрахи за министерка за труд и социјална политика, Невенка Стаменковска за заменик министерка за информатичко општество, Гордана Димитровска за заменик министерка за финансии и Цветан Трипуновски за заменик министер за земјоделство, шумарство и водостопанство (МЗШВ). Ова се предложените кандидати на ВМРО-ДПМНЕ за преостанатите четири позиции во техничката Влада, потврдуваат за Нова ТВ извори од опозициската партија.
Мизрахи, според партиски извори, е политички неактивна и по вокација е доктор на науки по биохемија. Политички активна, велат од ВМРО-ДПМНЕ, не е ниту Димитровска која била шефица на кабинетот на Христијан Мицкоски за време на неговиот ангажман во ЕЛЕМ. Стаменковска е пратеничка во актуелниот состав на македонското Собрание, додека Трипуновски раководеше со државната фитосанитарна лабораторија од 20056 година до 2008 година, во период од 2015 година до 2017 гопдина беше на чело на Државниот земјоделски инспекторат (ДЗИ), а работеше и како државен советник во МЗШВ.
Од опозициските кадровски решенија за техничката Влада останува уште Министерството за внатрешни работи. Предлог на ВМРО-ДПМНЕ за позицијата е Драган Ковачки, кандидат што е спорен за СДСМ поради неговиот ангажман во Армијата. Притоа од владејачката партија се повикуваат на член 97 од Уставот во кој е наведено дека „со органите на државната управа во областа на одбраната и полицијата раководат цивилни лица кои непосредно пред изборот на тие функции биле цивили најмалку три години“.
Техничката Влада на чие чело ќе биде досегашниот министер за внатрешни работи Оливер Спасовски ќе треба да почне со работа на 3 јануари, на 100 дена до предвремените парламентарни избори што се закажани за 12 април.